လူဝင်စား ?

လူဝင်စားဆိုတာကို ကျွန်မ သိပ်အယုံအကြည်မရှိပေမယ့် ဂမ္ဘီရ၊ ဖြစ်ရပ်ဆန်းကြယ်စတဲ့ စာအုပ်တွေကိုတော့ ကျွန်မတော်တော်ဖတ်ဖြစ်ခဲ့တယ်။ ဖြစ်ရပ်မှန်စာအုပ်တွေက ကျွန်မစာပိုဖတ်ဖြစ်အောင် ဆွဲဆောင်ခဲ့တယ်ဆိုရင်လည်း မှားမယ်မထင်ပါဘူး။ စာအုပ်ထဲမှာဖတ်ဖူးတဲ့ လူဝင်စားအကြောင်းတွေကို သိပ်မယုံကြည်ခဲ့ပေမယ့် ကျွန်မတို့မိသားစုကြုံလာခဲ့တဲ့ လူဝင်စားကိုတော့ ကျွန်မနည်းနည်း ယုံကြည်ခဲ့မိတယ်။ ဒါကလည်း ကျွန်မရဲ့ စိတ်အစွဲကြောင့် ဖြစ်မယ်ထင်ပါတယ်။

ကျွန်မအစ်မရဲ့ ပြောပြချက်အရ ကျွန်မအမေဆုံးပြီး နှစ်ဝက်အကြာ ညတစ်ညမှာ သူအိပ်မက်တစ်ခု မက်ခဲ့တယ်လို့ဆိုတယ်။ အဲဒီအိပ်မက်ထဲမှာ အမေဟာ အဝတ်သေတ္တာတစ်လုံးနဲ့ ထီးတစ်ချောင်းကိုင်ပြီး အိမ်ရှေ့တံခါးဝမှာ လာရပ်နေခဲ့တယ်။ အစ်မကတံခါးဖွင့်ပြီး "အမေဘယ်သွားမလို့လဲ"လို့မေးတော့ အမေက "နင့်သားလေးက ဆိုးလိုက်တာ.. အိမ်ဖော်တွေကလည်း မမြဲဘူး။ နင်တို့အိမ်မှာ ငါနေဖို့ လာခဲ့တာ"လို့ ပြောတယ်။ အစ်မကလည်း "အမေလာနေတော့ ကောင်းတာပေါ့" ဆိုပြီး တံခါးဖွင့်ပေးလိုက်တယ်။ အဲဒီနောက် နောက်တစ်ရက်မှာ အစ်မမှာကိုယ်ဝန်ရှိလာခဲ့တယ်လို့ ဆိုတယ်။

အဲဒီတုန်းက အစ်မရဲ့သားက(၁)နှစ်ကျော်အရွယ်မို့ ယောက်ျားလေးသဘာဝ အရမ်းဆိုးခဲ့တယ်။ ဆိုးလွန်းလို့ ကလေးထိန်းတွေက သူ့ဒဏ်မခံနိုင်ကြဘဲ မကြာခဏအသစ်ပြောင်းနေရတယ်။ အစ်မကိုယ်ဝန်ရှိပြီး ကလေးမွေးတော့ မိန်းကလေးမွေးတယ်။ အဲဒီသမီးလေးက လုံးဝမဆိုး၊ မငိုတတ်ခဲ့ဘူး။ ထားတဲ့နေရာမှာပဲ ဆိတ်ဆိတ်ငြိမ်ငြိမ်လေးနဲ့ နေတတ်တယ်။ စကားပြောတတ်စအရွယ်မှာတော့ "ငါ့အိမ်ပြန်မယ်၊ ငါ့ရွာပြန်မယ်၊ ငါလယ်တွေအများကြီးရှိတယ်" လို့ ပြောနေတတ်တယ်။ နောက်ပြီး အမေဆုံးတုန်းက အင်္ကျီအပန်းရောင်နဲ့မို့ ဒီသမီးလေးလည်း သိတတ်စအရွယ်တည်းက ဘာမဆိုအပန်းရောင်ပဲ ကြိုက်ခဲ့တယ်လို့ဆိုတယ်။ အဲဒီလောက် အခြေအနေထိတော့ လူဝင်စားဆိုတာကို ကျွန်မ မယုံကြည်သေးဘူး။ ဆုံးသွားတဲ့အမေကို အစ်မစိတ်စွဲပြီး စိတ်ကူးယဉ်နေတယ်လို့ပဲ ထင်ခဲ့တယ်။

ကျွန်မညီမအငယ်ဆုံးက ဗေဒင်ဝါသနာပါသူပါ။ ဘယ်နေရာမှာ အကြားအမြင်ဆရာရှိတယ်၊ ဘယ်ဗေဒင်ဆရာက မှန်တယ်ဆိုရင် ဘယ်လောက်ခရီးဝေးဝေး အရောက်သွားမေးတတ်သူဖြစ်တယ်။ ဟိုတစ်လောကလည်း အင်းလေးဘက်မှာ အကြားအမြင်ဆရာမ တစ်ဦးရှိတယ်ဆိုတာနဲ့ သူရောက်သွားခဲ့တယ်။ အဲဒီအကြားအမြင်ဆရာမက မျက်မမြင် အပျိုကြီးတစ်ဦးဖြစ်ပြီး မိန်းမသဘာဝဖြစ်တဲ့အချိန်၊ လပြည့်၊ လကွယ်တွေမှာ မဟောဘူးလို့ဆိုတယ်။ ဥဒေါင်းတောင်သွားတဲ့ဘက် အင်းလေးရွာထဲအထိ ဝေးခဲ့ခရီးကို ဆရာမနဲ့ဆုံရဖို့ သူနှစ်ခေါက်တောင် သွားခဲ့တယ်။

ညီမလေးသွားမေးတော့ အကြားအမြင်ဆရာမက ဟောတဲ့အချိန် သူ့လက်ကောက်ဝတ်ကိုပဲ ကိုင်ပြီး ဘယ်ကလာတယ်၊ ဘာနာမည်ခေါ်လဲလို့ တစ်ခွန်းမှမမေးခဲ့ဘူးလို့ ညီမလေးကပြောပြတယ်။ အဲဒီနေ့က "ကျွန်မအမေဘယ်ရောက်နေလဲ"လို့ သူစမေးတော့ ဆရာမက အကြာကြီးအာရုံစိုက်ပြီးမှ မောပန်းတဲ့အသံနဲ့ "တာချီလိတ်မှာ"လို့ ဖြေခဲ့တယ်။ ကျွန်မတို့အမေကို တာချီလိတ်မှာ မြုပ်ထားတာကြောင့် အမေရဲ့ဝိညာဉ်က တာချီလိတ်ကနေ အင်းလေးအထိ ခရီးဝေးကြီးခေါ်ခဲ့ရတဲ့အတွက် သူမောပန်းတဲ့အကြောင်း ဆရာမကပြောပါတယ်။ ညီမလေးက ဆက်ပြီး "ဘယ်သူ့အိမ်မှာလဲ" လို့မေးတော့ ဆရာမက ကျွန်မအစ်မရဲ့နာမည်ကို ပြောတယ်လို့ဆိုတယ်။ နောက်ပြီး "ငါ အဲဒီမှာ မနေချင်ဘူး။ အားလီက ခဏခဏဆဲတယ်" လို့ပြောတယ်။ တကယ်လည်း ကျွန်မအစ်မက နည်းနည်း ဆူပူပူလုပ်တတ်သူပါ။

ညီမလေးက "အဖေနဲ့ တွေ့သေးလား"လို့ သေဆုံးသွားပြီဖြစ်တဲ့ ကျွန်မအဖေကိုလည်းမေးတော့ အမေဝိညာဉ်ဝင်နေတယ်လို့ဆိုတဲ့ ဆရာမက "တစ်ခါတလေတော့ တွေ့တယ်" လို့ဖြေတယ်။ ကြည့်ရတာ အဖေနဲ့အမေကို ကျွန်မတို့ခွဲမြုပ်ထားခဲ့လို့ ဖြစ်မယ်ထင်ပါတယ်။ "အဖေနာမည်က ဘာလဲ" လို့ ညီမလေးက ကျွန်မအမေဝိညာဉ်ဝင်နေမှန်း ပိုသေချာအောင်မေးတော့ "လူး... လူး.." ဆိုပြီး အဖေ့နာမည်ကို အဖျားဆွတ်ခေါ်ပြခဲ့တယ်။

"ဒီဘဝမှာ အမေနာမည်က ဘာလဲ" လို့ ထပ်မေးတော့ "ဖူး...ဖူး"လို့ ပြောခဲ့တယ်။ တကယ်လည်း အစ်မသမီးလေးရဲ့ နာမည်က "နန်းခမ်းဖူးဖူး"ဖြစ်တယ်။

"ဟိုကောင်လေးတစ်ယောက် အိမ်သိပ်မကပ်ဘူးနော်။ ဘယ်တွေသွားနေလဲ"လို့ ဆရာမ(အမေ)က ကျွန်မညီမလေးကို မေးတယ်။ ဟိုကောင်လေးဆိုတာ ကျွန်မမောင်လေးအငယ်ဆုံးကို ပြောတာဖြစ်ပြီး အမေဆုံးကတည်းက မောင်လေးဟာအိမ်မှာမနေဘဲ ရန်ကုန်ကအဒေါ်အိမ်မှာ သွားနေခဲ့လို့ဖြစ်တယ်။ အမေဆုံးတုန်းက မောင်လေး(၁၄)နှစ်ပဲရှိပါသေးတာမို့ မောင်လေးကို အမေစိတ်ချဟန် မတူခဲ့ဘူး။

"တစ်ခြားသမီးတွေကို ဘာလို့မမေးတာလဲ"လို့ ညီမလေးကမေးတော့ အမေက "အချိန်ကြာပြီဆိုတော့ ငါသိပ်မမှတ်မိတော့ဘူး။ အရင်ဘဝကိုလည်း သံယောဇဉ်မထားတော့ဘူး" လို့ဖြေတယ်။ အရင်ဘဝကို တမ်းတမနေဘဲ ဘဝသစ်တစ်ခုမှာပဲ အမေပျော်နေပုံရတယ်။

အဲဒီလို ညီမလေးက ကျွန်မကိုပြောပြတော့ လူဝင်စားဆိုတာကို ကျွန်မယုံကြည်ချင်သလိုလို ဖြစ်မိတယ်။ ဘာဖြစ်လို့လဲဆိုတော့ အကြားအမြင်ဆရာမကို ညီမလေးသွားမေးခဲ့တဲ့အချိန်က အစ်မသမီးလေး နေမကောင်းတဲ့အချိန်နဲ့ သွားတိုက်ဆိုင်နေလို့ဖြစ်တယ်။ ဝိညာဉ်အခေါ်ခံရလို့ လိပ်ပြာညံ့သွားတာလားလို့ ကျွန်မတွေးမိပြီး ညီမလေးကိုနောက်တစ်ခါ ဗေဒင်ဘယ်လောက်မှန်မှန် အမေအကြောင်းမမေးဖို့ မှာဖြစ်ခဲ့တယ်။

အစ်မသမီးလေးကို တစ်ခါတလေ ကျွန်မသွေးထိုးစမ်းပြီး အမေအကြောင်းတွေ မေးကြည့်တတ်တယ်။ လူဝင်စားဆိုတာကို ကျွန်မစိတ်ချလက်ချ ယုံကြည်ချင်လို့ပါ။ ဒါပေမယ့် အသက်အရွယ်ကြီးလာတာနဲ့အမျှ အရင်ဘဝရဲ့မှတ်ဥာဏ်တွေ တဖြေးဖြေး လျော့သွားခဲ့လို့ထင်တယ်။ ငယ်ငယ်တုန်းကလောက် သူဘာမှ ပြန်မပြောနိုင်ခဲ့တော့ပါဘူး။ တူမလေးဟာ အမေဝင်စားတာပဲဖြစ်ဖြစ်၊ အမေမဝင်စားတာပဲဖြစ်ဖြစ် ကျန်းကျန်းမာမာ၊ ပျော်ပျော်ရွှင်ရွှင်နဲ့ သူ ရှင်သန်ကြီးထွားဖို့ပဲ ကျွန်မမျှော်လင့်ခဲ့ပါတယ်။

ရုပ်ချင်းဆင်တဲ့ အမေငယ်ငယ်ကပုံနဲ့ ဖူးဖူးပုံက လူဝင်စားဆိုတာ တကယ်ရှိကြောင်း ကျွန်မကို ပိုကြည်စေခဲ့သလား မပြောတတ်ပါဘူး.. ဒါကလည်း ကျွန်မရဲ့စိတ်အစွဲကြောင့် ဖြစ်မယ်ထင်ပါတယ်။

နိုင်းနိုင်းစနေ

လူဝင်စား ?