"တုံးလည်"သို့ တစ်ခေါက်

တစ်နေ့က ကျွန်မတို့ "တုံးလည်" ရောက်သွားခဲ့သေးတယ်။ အဲဒီနေ့က နေသာလိုက် မိုးရွာလိုက်ပေါ့....

အစကတော့ တုံးလည်ကို ကျွန်မတို့ အင်းလေးဘက်ကနေ စက်လှေနဲ့သွားမလို့ပါပဲ။ ဒါပေမယ့် အဲဒီဘက်မှာ ရေခန်းသွားပြီဆိုလို့ ကျွန်မတို့ခေါင်တိုင်ဘက်ကနေ ဆိုင်ကယ်နဲ့ပတ်ပြီး သွားခဲ့ကြတယ်။ သွားဖူးတဲ့လူက ခေါင်တိုင်နဲ့ တုံးလည်ကို ဆိုင်ကယ်အမြန်မောင်းရင် နာရီဝက်ကြာတယ်လို့ဆိုတယ်။ တကယ်တမ်းသွားကြည့်တော့ ခေါင်တိုင်လွန်တာနဲ့ လမ်းက ကျောက်ခင်းလမ်း၊ တချို့နေရာတွေမှာ မြေလမ်းဖြစ်ပြီး မိုးရွာထားလို့ တချို့နေရာမှာ ရွံ့အိုင်တွေဖြစ်နေတယ်။ တချို့နေရာဆို လမ်းဆင်းလျှောက်ရတဲ့အထိ လမ်းဆိုးပါတယ်။ ဆိုင်ကယ်ကို ဖြေးဖြေးမောင်းလိုက်၊ မြန်မြန်မောင်းလိုက်နဲ့ နာရီဝက်၊ တစ်နာရီမက ကျွန်မတို့စီးခဲ့ရတယ်။ လမ်းဆိုးတဲ့အပြင် နေရာကလည်း ခေါင်လွန်းပါတယ်။ တစ်ရွာနဲ့တစ်ရွာ ဝေးလွန်းပြီး တောအုပ်တွေချည်းမို့ တစ်ခါမှမသွားဖူးတဲ့နေရာမို့ နည်းနည်းတော့ ကြောက်မိတယ်။ ဒါပေမယ့် ကျွန်မတို့အဖွဲ့က ရှစ်ယောက်ဆိုတော့ အင်အားတော့တောင့်တယ်း)

တောင်ကြီးကနေ ဆိုင်ကယ်နှစ်နာရီကျော်ကျော်လောက် စီးပြီးနောက် တုံးလည်ကို ကျွန်မတို့ရောက်ပါတယ်။ တုံးလည်ရွာက ရွာကြီးဖြစ်ပြီး တောင်ခြေမှာတည်ရှိပါတယ်။ လယ်ကွက်တွေကြားမှာ ရွာပတ်ဝန်းကျင်က စိမ်းစိမ်းစိုစိုမို့ နေချင်စရာလေးပါ။ "ရေတွေတော်တော်ခန်းသွားတယ်၊ နို့မဟုတ်ရင် မော်တော်ဒီအထိရောက်တယ်"လို့ လမ်းမှာတွေ့တဲ့ ရွာခံတွေကပြောပါတယ်။

ရွာထိပ်ဘုန်းကြီးကျောင်းမှာ ဆိုင်ကယ်တွေ ထားခဲ့ကြပြီး လာရင်းအကြောင်းနဲ့ လမ်းမှာတွေ့တဲ့ ရွာသားတွေကို ကျွန်မတို့ လမ်းမေးပါတယ်။ "မှော်နတ်ဆရာမအိမ်လား? ဟိုးမှာ.." လို့ ထရံကာထားတဲ့ နှစ်ထပ်အိမ်ကို ညွှန်ပြကြတယ်။ အဲဒီ သူတို့ပြောတဲ့ မှော်နတ်ဆရာမအိမ်ရောက်တော့ ဆရာမက ရှိမနေဘူး။ ဘုန်းကြီးကျောင်းမှာ ဆွမ်းကျွေးလို့ ဒီနေ့ပိတ်ထားတယ်လို့ဆိုတယ်။ ကျွန်မတို့မှာ ခရီးဝေးကနေ ခက်ခက်ခဲခဲ လာခဲ့ရတာမို့ ဆရာမကို သွားရောက်ခေါ်ပေးဖို့ ပြောတယ်။ တကယ်တမ်းတော့ ကျွန်မတို့ တုံးလည်ကို သွားသာသွားကြတာ.. တစ်ယောက်မှ မေးမြန်းချင်လို့ သွားကြတာမဟုတ်ဘူး။ မရောက်ဖူးလို့၊ ကြည့်ချင်လို့ သွားကြတာဖြစ်တယ်။ တကယ်လို့ ကျွန်မတို့ရောက်တုန်း တခြားမေးမြန်းသူတွေရှိရင် လူများမေးမြန်းနေတာကို ကြည့်ပြီး ပြန်လာကြဖို့ စိတ်ကူးထားကြတာပါ။ ကျွန်မတို့ရောက်တော့ ပိတ်ထားတယ်၊ တခြားမေးသူတွေလည်းမရှိတော့ ဆရာမကို ဘုန်းကြီးကျောင်းကနေ ကျွန်မတို့ အတင်းသွားပြန်ခေါ်ပြီး မေးလိုက်ကြပါတယ်။

ဆရာမက အသက်(၃၈)နှစ်အရွယ်ဖြစ်ပြီး ပိန်ပိန်ပါးပါးလေးပါ။ ကျွန်မတို့သွားခေါ်တုန်းက သူ့ပုံစံက ရှက်ကိုးရှက်ကန်းနဲ့ အားနာပုံပေါက်နေတယ်။ ဆရာမဆိုတဲ့ ဟိတ်ဟန်တစ်စက်မှ ရှိမနေပါဘူး။ ဒီအတတ်ကို ဘုရားရှိခိုး၊ ပုတီးစိတ်ရာက သူ့အလိုလို တတ်မြောက်လာတာဖြစ်ပြီး လွန်ခဲ့တဲ့(၁၄)နှစ်ကတည်းကလို့ ဆိုပါတယ်။ စတတ်မြောက်တုန်းက မနက်(၇)နာရီက ည(၇)နာရီထိ ထိုင်ဟောနေရတာကြောင့် အရိုးချဉ်ဆီတက်ရောဂါဆိုလားဖြစ်ပြီး နားလိုက်ရသေးတယ်လို့ဆိုတယ်။ ခုပြန်ဟောတာ နှစ်သိပ်မကြာသေးပါဘူးတဲ့။

ကျွန်မတို့ကို ဘယ်နှစ်ယောက်၊ ဘယ်နှပွဲဟောမလဲလို့ သူမေးပါတယ်။ အသေမေးမှာလား? အရှင်မေးမလားလို့လည်း ဆိုတယ်။ ကျွန်မတို့က မြင်ဖူးသည်ရှိအောင် သွားတာဖြစ်ပြီး မေးမြန်းဖို့ စိတ်မကူးထားလို့ ပါလာတဲ့လူတွေကို နင်မေး၊ ငါမေးနဲ့ ဖြစ်နေခဲ့တယ်။ နောက်ဆုံးမှာ မတင်မေက ကွယ်လွန်သွားပြီဖြစ်တဲ့ သူ့အမေကို မေးပါတယ်။ မတင်မေ အမေရဲ့ဝိညာဉ် ဆရာမကိုယ်ထဲဝင်တော့ ဆရာမရုပ်ဟာ သူ့နဂို(၃၈)နှစ်ရုပ်နဲ့ မတူတော့ဘဲ အသက်(၅ဝ)အဘွားအိုလို ချက်ချင်းအိုကျသွားပြီး ရှမ်းသံလိုလို၊ တရုတ်သံလိုလို အသံပြောင်းသွားပါတယ်။ (မတင်မေ အမေကရှမ်းလူမျိုးပါ) ကိုယ်လက်အမူအရာတွေလည်း ပြောင်းသွားပါတယ်။ မတင်မေက သူ့အမေနဲ့မတူဘူးလို့ဆိုတယ်။ ကျန်သူတွေက တူတယ်လို့ဆိုတယ်။ ကျွန်မလည်း တူလား? မတူလား? မဝေခွဲတတ်တော့ပါဘူး....

တစ်ယောက်ဟောပြီးတော့ ဘယ်သူထပ်ဟောမလဲလို့ မေးကြပြန်တယ်။ အသေလည်းမမေးချင်၊ အရှင်လည်း မေးဖို့မရှိတော့ ကိုယ်တိုင်မေးမယ်ရလားဆိုတော့ ရပါတယ်တဲ့.. ဒါနဲ့ ကိုယ်ကိုယ်တိုင် သိလိုရာတွေ မေးမြန်းကြပြန်တယ်။ တစ်ပွဲပြီးတိုင်း ဆရာမက ဆန်၊ ဖယောင်းတိုင်၊ အမွှေးတိုင်နဲ့ စေတနာရှိသလောက် ကန်တော့တဲ့ပိုက်ဆံကို ပန်းကန်ပြားတစ်ချပ်ပေါ်တင်ပြီး ဘုရားအရင်ပူဇော်ပါတယ်။ ပူဇော်ပြီး သူ့လက်နှစ်ဘက်နဲ့ ခေါင်းကိုကိုင်ပြီး ဘုရားစာလိုလို၊ ဂါထာလိုလို တအားအော်ရွတ်ပါတယ်။ ခေါင်းကိုကိုင်ထားရင် အားလုံးကို သူမြင်ရတယ်လို့ဆိုတယ်။ မေးမြန်းသူရဲ့ မွေးနေ့ နေ့သားကိုမေးပြီး နောက်ကိုလှည့်မကြည့်ဘဲ တောက်လျှောက် စကားထစ်အတာမျိုးမရှိဘဲ ဟောသွားလိုက်တာ (၄၅)မိနစ်လောက် ကြာပါတယ်။

ဆရာမ ဟောရတာ မောမှာဆိုးလို့ လိုရင်းတိုရှင်းပဲ ဟောပေးပါလို့ ပြောယူရတဲ့အထိပါပဲ။ သူက မမောပါဘူး... သူပြောနေတာ မဟုတ်ဘူး.. တခြားသူ ဝင်ပူးပြီးပြောနေတာလို့ ပြောပါတယ်။ တကယ်လည်း သူဟောတဲ့အချိန် သူ့နဂိုအင်းသားသံမဟုတ်ဘဲ ဗမာသံပေါက်ပြီး အသံကစူးပါတယ်။ သူဟောသမျှ တော်တော်များများ မှန်နေပါတယ်။

ဓာတ်ပုံရိုက်လို့ရလားလို့ ကျွန်မတို့ခွင့်တောင်းတော့ ပုံတော့ရိုက်ပါ၊ အသံမသွင်းပါနဲ့လို့ဆိုတယ်။ အရင်က သေသွားတဲ့လူတစ်ယောက်ကို သူ့အိမ်သားတွေ လာမေးကြတော့ ရိုးရိုးသေတာမဟုတ်ဘူး၊ ရင်ဘတ်မှာ တစ်ခုခုနဲ့ရိုက်ပြီး သေသွားတာလို့ ဟောလိုက်တာကို အသံသွင်းသွားပြီး အလောင်းကိုပြန်ဖော် စစ်ဆေးကြတာ ဟုတ်မှန်ခဲ့လို့ အမှုအခင်းဖြစ်ခဲ့ဖူးတယ်လို့ ဆိုတယ်။

ကျွန်မတို့လည်း အဲဒီမှာ ဟောပြီး မေးပြီး၊ ထုပ်သွားတဲ့ ကောက်ညှင်းပေါင်းတွေ ဝေမျှစားပြီး၊ မိုးမရွာခင် တောင်ကြီးကို ပြန်ခဲ့ကြတယ်။ မပြန်ခင် "တုံးလည်"အကြောင်းမေးတော့ ရွာနဲ့မနီးမဝေးမှာ (၃)တွင်း၊ ရွာနဲ့နည်းနည်းဝေးတဲ့နေရာမှာ (၂)တွင်းရှိတယ်လို့ ပြောပါတယ်။ သူတို့က နတ်ရေတွင်းလို့ ခေါ်ကြတယ်။ ရွာနဲ့မနီးမဝေးက တွင်းကို သွားကြည့်ချင်တယ်လို့ ကျွန်မတို့ ပြောတော့ သူတို့က "အခု တုံးမလည်နေဘူး"တဲ့။ တုံးမလည်တာပဲ ကောင်းပါတယ်လို့ ပြောခဲ့ပါတယ်။ တွင်းဆီသွားဖို့ ဆိုင်ကယ်ကို လမ်းဘေးမှာရပ်ခဲ့ပြီး လမ်းလျှောက်သွားကြည့်ရမယ်ဆိုလို့ ကျွန်မတို့လည်း မိုးရွာပြီး လမ်းချော်မှာ စိုးတာကတစ်ကြောင်း၊ ဆိုင်ကယ်ကို လမ်းဘေးမှာ မရပ်ရဲခဲ့တာကတစ်ကြောင်း၊ လမ်းမှာ လူပြတ်လို့ တွင်းဆီ ဘယ်ကဘယ်လိုသွားရမယ်ဆိုတာကို မေးမြန်းဖို့ လူရှာမတွေ့ခဲ့တာကတစ်ကြောင်း သွားမကြည့်ခဲ့တော့ပါဘူး။ မိုးခပ်ဖွဲဖွဲ စရွာချိန်မှာ အပြန်ညောင်ရွှေဘက်က ငါးကန်မှာ ငါးကင်သွားစားကြမယ်ဟေ့လို့ ကြုံးဝါးရင်း ဆိုင်ကယ်ကို သတိထားစီးပြီး ကျွန်မတို့ ပြန်လာခဲ့ကြပါတော့တယ်။

နိုင်းနိုင်းစနေ

"တုံးလည်"သို့ တစ်ခေါက်